علي سلم بيتنا المتكسر
بقوالبه الطين
كان واقف.جنبي وبيفكر
ولكنه حزين
وملامحه اللي بتشبه قمحه
مرويه بالصبر سنين
علي كتفه شايل خلقاته
وحياته مقسومه اتنين
بين طرحه الطارح ف مطارحه
ومطارح مش لا قين عجين
كان واقف علي سلم بيتنا
يتأمل ف ملامح زادنا
وان زاد الجرح اللي ف قلبه
يتسند علي دمع العين
وأنين الحيره اللي ف عقله
مش عارف مين اللي مسافر
ولا فاكر هنروح علي فين
بيشاور للشمس تعدي
وتهدي فوق الخدين
بيشاور للورد البلدي
والفل ف حضن الياسمين
كان لسه بيحلم بمبارح
والحلم الطارح ف الطين
كان لسه عايش ع الفطره
والفطره مقسومه اتنين
وتعدي سنين …
والمطر النازل ع السلم
متحدي الطين
بيبوش فيه
ويشد الدرجه المكسوره
من بين رجليه
أتاريه مش شايف أو عارف
بيموت مين
بيخلص بكره من امبارح
ولا الاتنين
علي سلم بيتنا المتكسر
بقوالبه الطين
كان بكره وف ايده امبارح
دايما واقفين
وانا واقف علي درجة سلم
مش عارف
انا هو ………؟.
وللا احنا اتنين ؟

الشاعرالغنائي/ رضا أبو الغيط
مصر