وقت لبقعد لحالي 
بيصير إحساسي عالي
بشعر بأبسط لأمور
وبيضخمها خيالي
أحيانا بشعر إني
مسرورة وبدي غني
وبشعر قلبي عم يطير
والعالم قطعة مني
ولازم كون عنصر فعال
وأعمل أحسن الأعمال
تا يحل بأرضي السلام
وحقق كل الأماني
ولازم إبقى كبيرة كتير
وعلى طول عم اعمل للخير
وساعد لكبير ولصغير
وملي هالدني غناني
…………….
وأحيانا بشعر إني
زهقانة غصبن عني
وكرهانة الدني كلا
حتى أشعاري وفني
وكرهانة حتى حياتي
وناسي وأهلي ورفقاتي
وبدي إنسى كل الكون
وإبعد عن ذكرياتي
وماني قبلانة حالي
وكرهانة حتى خيالي
وشكلي عصبية كتير
ومن هالدنية زهقاني
وبشعر إنو كل الناس
وحوش وما عندن إحساس
وبدي إبعد عنهم دوم
وما أعطيهم عنواني
……………..
وبرجع براجع حالي
وبعرف إني عم غالي
عم ضخم كل الأمور
وعم عكر غيري وحالي
وبشعر إني إنسانة
في عندي عقل وإيمان
وبرجع بزين الأمور
بميزان الدهب الغالي
وما بخلي العقل معطل
والأهواء عم تتحكم
بعدين بتكرهني الناس
بتبعد عني الغوالي
ورح إنصح أنا هالناس
تشغل العقل بالراس
حتى تدوم المحبة
لأنو العمر فاني
…………………………….
د.ملك محمود الأصفر